Poet
kahan ke jam-o-subu kya tulua-e-mai-ḳhana
tiri nigah na karti jo kar-e-rindana
harim-e-husn na ka.aba na sahn-e-but-ḳhana
dil-e-shikasta-e-ashiq hai ḳhuld-e-janana
ye teri yaad ka e.ajaz tha ki faiz-e-junun
har ik maqam se guzra huun be-niyazana
bat-e-sharab thi ḳhamosh dil-zada mai-kash
ye kaun aaya ki lau de uTha hai mai-ḳhana
qalandari mira maslak sikandari hai tariq
guzar raha huun do-alam se be-niyazana
chhupa raha huun zamane se dil ke zaḳhmon ko
ki tera naam na ho jaa.e zeb-e-afsana
baḌha jo ilm to zehnon ko kar gaya tarik
haqiqaton ka banate hain log afsana
vo kam-nazar hain jo dete hain sham.a ko ilzam
ḳhud apni aag men jalta hai aap parvana
ḳhuda-shanas-o-ḳhud-agahi sarisht-e-junun
ḳhirad-asir tu ham hain ḳhirad sanam-ḳhana
Thahar gaya huun kahan jada-e-tamanna men
har aarzu nazar aati hai ek but-ḳhana
zamin-e-hazrat-e-‘iqbal’ men ye taaza ghazal
huzur-e-hazrat-e-‘iqbal’ mera nazrana
Leave a Reply