mausamon vaale na.e daana o paani vaale
ham vahi log vahi naql-e-makani vaale
haan bacha lenge yahi shahr ko jal jaane se
kuchh to baaqi hain abhi shahr men paani vaale
rang kya ḳhuub jamega jo kabhi mil baiThen
aur kuchh log tabi.at ki ravani vaale
is liye aur bhula deta huun va.ade akasr
mujh ko milte hi nahin yad-dahani vaale
koi saame jo mile mujh ko ḳhabar kar dena
hain mire shahr men sab log kahani vaale
Leave a Reply