apne hi dam se hai charcha kufr aur islam ka
gaah aabid huun khuda ka gah pujari raam ka
lotte hain jis ko sun sun kar hazaron murgh-e-dil
ho raha hai zikr kis ke gesuon ke daam ka
chashm-e-mast-e-yar ka ham-chashm lo paida hua
dekhna ab post khincha jaega badam ka
sair karta hai vo aalam ki mira paik-e-nigah
laakh hai be-dast-o-pa lekin hai phir sau kaam ka
sar juda tan se kiya ik haath men jallad ne
naqd-e-jan diije kiya us ne ye kaam inaam ka
hain shah-e-malk-e-junun sahra hai apna takht-gah
tan pe har dagh-e-junun sikka hai apne naam ka
jald naam apna bata de jaise banda huun tira
vasta deta huun main ai but khuda ke naam ka
but-parasti ki bahut ‘sayyah’ ab kar yaad haq
shughl-e-maula men rahe banda vahi hai kaam ka