Raza Amrohvi
huun shamil sab men aur sab se juda huun
main ḳhud ye sochta rahta huun kya huun
hisar-e-zat se bahar nikal kar
main har surat men tujh ko DhunDhta huun
vo mujh se duur bhi hai paas bhi hai
kabhi main apne dil men dekhta huun
main ḳhud kuchh bhi nahin huun ye bhi sach hai
nava vo hai magar main ham-nava huun
kabhi main apne aalam men nahin huun
kabhi raazi kabhi ḳhud se ḳhafa huun
mujhe kab tak is aalam men rakhega
tiri kya maslahat hai sochta huun
tamasha-gah-e-hasti ki na puchho
main ḳhud hi ibtida ḳhud intiha huun
mujhe jalvat men kya kya dekhna hai
abhi ḳhalvat men masruf-e-dua huun
‘raza’ ik banda-e-ajiz huun main to
vahi likhta huun jo kuchh dekhta huun
Leave a Reply