zulmaton men jiite hain, raushni ke maare hain
ek hi qabile ke chand aur sitare hain
ratjagon ke sathi hain, ashk, ahaTen, ḳhushbu
bas yahin kahin tu hai ya bharam hamare hain
aaj tak to rasman bhi tu ne ye nahin puchha
ham ne teri furqat men kaise din guzare hain
us ne mere pahlu men jhank kar nahin dekha
choT kitni gahri hai zaḳhm kitne saare hain
Tahniyon ki zinat the suliyon pe laTke hain
ḳhushk zard patte jo mausamon ke maare hain
ham ne apne purkhon ke ehtiram ki ḳhatir
farz bhi nibhaya hai, qarz bhi utare hain
main to ik musafir huun mera kaam hai chalna
manzilen tumhari hain raste tumhare hain
dil se tai to ho jaa.e saath kis ke jaana hai
raste nikalne ko yuun to Dher saare hain
ham ne kal zamane ko raushni dikha.i hai
aaj ham zamane ki raushni ke maare hain
Leave a Reply