ummid-e-vasl us se ḳhuda ki qasam nahin
kahte hain arz-e-bosa pe vo dam-ba-dam nahin
us ka tavaf karte hain ushshaq-e-roz-o-shab
ku-e-sanam bhi rutbe men ka.abe se kam nahin
mere saval-e-vasl ko lillah rad na kar
dekh ai sanam ye sheva-e-ahl-e-karam nahin
huron ka tujh men husn hai pariyon ki shoḳhiyan
ai but qasam ḳhuda ki kisi se tu kam nahin
yaan dard-e-dil se mujh ko nahin chain ab ghaḌi
un ko qarar shoḳhiyon se ek dam nahin
nazan hon apne baḳht-e-siyah par na kis tarah
ye tirgi men yaar ki zulfon se kam nahin
ankhen jo rone men to taḌapne men dil hai fard
vo abr se to ye kisi bijli se kam nahin
apne liye main un se rakhun ab umiid kya
sunta huun marg-e-ghair ka kuchh un ko gham nahin
tum imtihan-e-ghair kabhi karke dekh lo
rah-e-vafa men vo kabhi sabit-qadam nahin
jo kaam un ke lab se vo tere qadam se ho
Thokar bhi teri kuchh qum-e-isa se kam nahin
kis dam nahin hai yaar ki tegh-e-nigah ki yaad
kis vaqt mere qatl ka saman baham nahin
ham bevafa.iyan na karenge adu ki tarah
tum ko vahi ḳhayal abas hai vo ham nahin
apni vafa ka zikr hasinon men rah gaya
duniya men naam aaj hamara hai ham nahin
ankhen jo roiin hijr men ik hashr ho bapa
ye do habab nuuh ke tufan se kam nahin
mamnun huun ḳhuda ki inayat ka ai ‘fahim’
rahat ka mere kaun sa saman baham nahin
Leave a Reply