vo ek nazar men mujhe pahchan gaya hai
jo biiti hai dil par mire sab jaan gaya hai
rahne laga dil us ke tasavvur se gurezan
vahshi hai magar mera kaha maan gaya hai
tha saath nibhane ka yaqin us ki nazar men
mahfil se miri uth ke jo anjan gaya hai
auron par asar kya hua us hosh-ruba ka
bas itni khabar hai mira iman gaya hai
chehre pe mire dard ki parchhain jo dekhi
bedard mire ghar se pareshan gaya hai
is bhiid men ‘sarvat’ nazar aane lagi tanha
kis kuche men tera dil-e-nadan gaya hai
Leave a Reply