paas se yuun anchal lahrate log guzarte rahte hain
mere badan men qaus-e-quzah ke rang utarte rahte hain
apne andar chhupe hue dushman ka hai ehsas jinhen
meri tarah vo log bhi apne aap se Darte rahte hain
ham ne dekhna chhoḌ diye hain ik muddat se aise ḳhvab
ta.abiron ki chahat men jo ḳhvab ki marte rahte hain
raah men chahe dhuup kaḌi ho ya saa.e bahen phaila.en
jin ka kaam guzarna hai vo log guzarte rahte hain
laakh shanasa ho par ḳhushbu kis ko dikha.i deti hai
ek hamin hain der talak aahen jo bharte rahte hain
vasta paḌta hi rahta hai tez havaon se apna
ham be-ghar logon ke aksar jism bikharte rahte hain
sub.h-savere ghar se ‘ḳhavar’ nikle ho phir dhyan rahe
kali-rat ke lamhe din ka ruup bhi dharte rahte hain
Leave a Reply