junun ka raaz mohabbat ka bhed pa na saki
hamara saath ye duniya magar nibha na saki
bikhar gaya huun fazaon men bu-e-gul ki tarah
mire vajud men vus.at miri sama na saki
har ik qadam pe salib-ashna mile mujh ko
ye ka.enat vafaon ka baar uTha na saki
paTak ke rah ga.i sar apna rahguzaron se
miri sada dil-e-kohsar men sama na saki
khuli hava ki fasilon men zindagi hai asiir
fareb-e-rang se mahaul ko basa na saki
raza tulu-e-sahar tak hai zindagi shab ki
ye baat ahl-e-sitam ki samajh men aa na saki
Leave a Reply