phir ek daagh charagh-e-safar banate hue
nikal paḌe hain na.i rah-guzar banate hue
vo jast bhar ke hava ho gaya magar na khula
main kis navah men tha us ke par banate hue
nikal saki na koi aur surat-e-tasvir
baha.e ashk bahut chashm-e-tar banate hue
vo qahr barhami-e-baḳht hai ki Darte hain
gira na len kahin divar dar banate hue
qadam qadam pe saza de raha hai vaqt hamen
hamare aib udu ke hunar banate hue
to zindagi ko ji.en kyuun na zindagi ki tarah
kahin pe phuul kahin par sharar banate hue
Leave a Reply