jab bhi ghar ke andar dekhne lagta huun
khiḌki khol ke bahar dekhne lagta huun
tanha.i men aisa bhi kabhi hota hai
ḳhud ko bhi main chhu kar dekhne lagta huun
haath koi jab a.ankhon par aa rakhta hai
kaise kaise manzar dekhne lagta huun
pahle dekhta huun main kumak ḳhayalon ki
phir lafzon ke lashkar dekhne lagta huun
dekh dekh ke us ko ji nahin bharta to
banhon men phir bhar kar dekhne lagta huun
din bujh jaa.e to phir taare taare men
ḳhud ko ‘shaz’ munavvar dekhne lagta huun
Leave a Reply