raat ko pahlu men ik tasvir raushan ho ga.i
ḳhvab to dekha nahin ta.abir raushan ho ga.i
us but-e-kafir ko jo dekha bahut nazdik se
naqsh-gar ki shoḳhi-e-tahrir raushan ho ga.i
dasht-e-vahshat men ghubar-e-naqa-e-laila to hai
hasrat ai pa-e-junun zanjir raushan ho ga.i
zaḳhm-e-naumidi charaghan kar rahe hain ziist men
daagh kya raushan hue taqdir raushan ho ga.i
us ki ankhon men umaD aaya sitaron ka hujum
gul-kade men shauq ki tanvir raushan ho ga.i
arzuen sab shikasta ḳhvab saare munhadim
mere ghar men raunaq-e-ta.amir raushan ho ga.i
saz-e-dil-dari pe naghma-zan hui sham-e-visal
mauj-e-gul ki ḳhubi-e-taqrir raushan ho ga.i
raqs farmane lage sab ranj-o-gham soz-o-alam
sham-e-mina jal uThi tasir raushan ho ga.i
umr-e-zindan men guzari par ‘nadim’ itna to hai
mash.al-e-ḳhurshid se zanjir raushan ho ga.i
Leave a Reply