gham-e-ḳhamosh jo ba-ashk-chakan rakhta huun
ek Thahre hue dariya ko ravan rakhta huun
ik badalti hui duniya ka saman rakhta huun
un ki janib se mohabbat ka guman rakhta huun
shauq-e-taza ho ki ho hasrat-e-balida koi
kuchh na kuchh silsila-e-ah-o-fughan rakhta huun
kuchh jhijakti hui nazren hain ḳharidar jamil
main bhi palkon pe sitaron ki dukan rakhta huun
muntazir hain haram-o-dair ke goshe ya.ani
main ne jo sham.a jala.i hai kahan rakhta huun
maslahat hai ki tira tiir na ḳhali jaa.e
varna muTThi men iradon ki kaman rakhta huun
ghair ke haath men azadi-e-raushan ka charagh
main faqat murda charaghon ka dhuan rakhta huun
daagh huun lala-e-aqavam-e-jahan ke dil ka
main baharon ke kaleje pe ḳhizan rakhta huun
teri baḳhshi hui azad jabin ki saugand
ek sajda bhi ghulami men garan rakhta huun
koi manzil ho mujhe abla-pa.i se hai kaam
kuchh zamin kahti hai main paanv jahan rakhta huun
inqalabat-o-aza.em ke sanvarne ke liye
ek a.ina pas-e-lafz-o-bayan rakhta huun
meri duniya men na ka.aba hai na but-ḳhana ‘nushur’
dil ke goshe men magar dair-e-mughan rakhta huun
Leave a Reply