phuul sahra men khila de koi
main akela huun sada de koi
koi sannaTa sa sannaTa hai
kaash tufan uTha de koi
jis ne chaha tha mujhe pahle-pahal
us sitamgar ka pata de koi
jis se TuuTe mira pindar-e-vafa
mujh ko aisi bhi saza de koi
raat soti hai to main jagta huun
us ko ja kar ye bata de koi
jo mere paas bhi hai duur bhi hai
kis tarah us ko bhula de koi
ishq ke rang liye phirta huun
us ki tasvir bana de koi
dil ke ḳhirman men nihan hain sho.ale
apne daman ki hava de koi
phuul phir zaḳhm bane hain ‘nasir’
phir ḳhizaon ko dua de koi
Leave a Reply