Dushman Hain Wo Bhi Jaan Ke Jo Hain Hamare Log

dushman hain vo bhi jaan ke jo hain hamare log

aur aap ke hain dost zamane men saare log

aata nahin hai sahil-e-bahr-e-fana nazar

kya janen paar hote hain kis ke sahare log

kya janen un ki chaal men eajaz hai ki sehr

vo bhi unhin se mil gae jo the hamare log

ho kis zaban se mahfil-e-dildar ki sana

vo aftab-e-husn to anjum hain saare log

taqsir-var-e-ishq jo hota hai koi zabh

karte hain afv jurm ke un se ishare log

dekha baghaur aib se khali nahin koi

bazm-e-jahan men sab hain khuda ke sanvare log

chhoda na saath hashr tak aamal-e-nek ‘haqir’

sab ho gae luta ke lahad men kinare log

Leave a Comment