In Bala Ki Aandhiyon Mein Ek Shajar Baqi Rahe

Shafiq Saleemi

in bala ki andhiyon men ik shajar baaqi rahe

faḳhtaon ke liye koi to ghar baaqi rahe

ek taara ek dipak ek jugnu hi sahi

raat ki divar men koi to dar baaqi rahe

chand ki kashti tah-e-dariya hui thi jis jagah

kuchh nishan baaqi rahe koi bhanvar baaqi rahe

jaane vaale ko kabhi bhi lauT kar aana nahin

lauT aane ki bahar-surat ḳhabar baaqi rahe

sard mausam men uTha kar haath ye mangen dua

tan men jaan baaqi rahe jaan men sharar baaqi rahe

raah men thak kar kahin par baiTh mat jaana ‘shafiq’

ghar ki janib vapsi ka ik safar baaqi rahe