Ye Kis Rashk-E-Masiha Ka Makan Hai

Haidar Ali Aatish

ye kis rashk-e-masiha ka makan hai

zamin yaan ki chaharum asman hai

ḳhuda pinhan hai aalam ashkara

nihan hai ganj virana ayaan hai

dil-e-raushan hai raushan-gar ki manzil

ye a.ina sikandar ka makan hai

takalluf se bari hai husn-e-zati

qaba-e-gul men gul-buTa kahan hai

pasijega kabhi to dil kisi ka

hamesha apni aahon ka dhuan hai

ba-rang-e-bu huun gulshan men main bulbul

baghal ghunche ke mera ashiyan hai

shagufta rahti hai ḳhatir hamesha

qana.at bhi bahar-e-be-ḳhizan hai

chaman ki sair par hota hai jhagḌa

kamar meri hai dast-e-baghban hai

bahut aata hai yaad ai sabr-e-miskin

ḳhuda ḳhush rakkhe tujh ko tu jahan hai

ilahi ek dil kis kis ko duun main

hazaron but hain yaan hindostan hai

yaqin hota hai ḳhushbui se is ke

kisi gul-ru ka ghuncha itr-dan hai

vatan men apne ahl-e-shauq ki tarah

safar men roz-o-shab reg-e-ravan hai

sahar hove kahin shabnam kare kuuch

gul o bulbul ka dariya darmiyan hai

sa.adat-mand qismat par hain shakir

huma ko maghz-e-badam ustuḳhvan hai

dil-e-betab jo is men gire hain

zaqan janan ka paara ka kuaan hai

jaras ke saath dil rahte hain nalan

mire yusuf ka ashiq karvan hai

na kah rindon ko harf-e-saḳht vaa.iz

durusht ahl-e-jahannum ki zaban hai

qad-e-mahbub ko sha.er kahen sarv

qayamat ka ye ai ‘atish’ nishan hai