na Dagmaga.e kabhi ham vafa ke raste men
charagh ham ne jala.e hava ke raste men
kise laga.e gale aur kahan kahan Thahre
hazar ghuncha-o-gul hain saba ke raste men
ḳhuda ka naam koi le to chaunk uThte hain
mile hain ham ko vo rahbar ḳhuda ke raste men
kahin salasil-e-tasbih aur kahin zunnar
bichhe hain daam bahut mudda.a ke raste men
abhi vo manzil-e-fikr-o-nazar nahin aa.i
hai aadmi abhi jurm o saza ke raste men
hain aaj bhi vahi dar-o-rasan vahi zindan
har ik nigah-e-rumuz-ashna ke raste men
ye nafraton ki fasilen jahalaton ke hisar
na rah sakenge hamari sada ke raste men
miTa sake na koi sail-e-inqalab jinhen
vo naqsh chhoḌe hain ham ne vafa ke raste men
zamana ek sa ‘jalib’ sada nahin rahta
chalenge ham bhi kabhi sar uTha ke raste men
Leave a Reply