dil tujhe naaz hai jis shaḳhs ki dildari par
dekh ab vo bhi utar aaya adakari par
main ne dushman ko jagaya to bahut tha lekin
ehtijajan nahin jaaga miri bedari par
aadmi aadmi ko khaae chala jaata hai
kuchh to tahqiq karo is nai bimari par
kabhi is jurm pe sar kaat diye jaate the
ab to inaam diya jaata hai ghaddari par
teri qurbat ka nasha tuut raha hai mujh men
is qadar sahl na ho tu miri dushvari par
mujh men yuun taaza mulaqat ke mausam jaage
aaina hansne laga hai miri tayyari par
koi dekhe bhare bazar ki virani ko
kuchh na kuchh muft hai har shai ki ḳharidari par
bas yahi vaqt hai sach munh se nikal jaane do
log utar aae hain zalim ki taraf-dari par