Wo Bahte Dariya Ki Be-Karani Se Dar Raha Tha

vo bahte dariya ki be-karani se Dar raha tha

shadid pyasa tha aur paani se Dar raha tha

nazar nazar ki yaqin-pasandi pe ḳhush thi lekin

badan badan ki guman-risani se Dar raha tha

sabhi ko niind aa chuki thi yuun to pari se mil kar

magar vo ik tifl jo kahani se Dar raha tha

larazte honTon se gir paḌe the huruf ik din

dil apne jazbon ki tarjumani se Dar raha tha

lughat-e-jan se kashid karte hue suḳhan ko

main ek harf-e-ghalat ma.ani se Dar raha tha

jama hua ḳhuun hai ragon men na jaane kab se

ruka hua ḳhvab hai ravani se Dar raha tha

vo be-nishan hai jise nishan ki havas thi ‘azar’

vo ra.egan hai jo ra.egani se Dar raha tha