Ghulam Husain Sajid
sisak rahi hain thaki hava.en lipaT ke unche sanobaron se
lahu ki mahkar aa rahi hai kaTe hue shaam ke paron se
ajab nahin ḳhaak ki udasi bhari nigahon ka izn pa kar
palaT paḌen ek din ravan paniyon ke dhare samundaron se
vo kaun tha jo kahin bahut duur ke nagar se pukarta tha
vo kya sada thi ki aisi ujlat men log ruḳhsat hue gharon se
badan men phir saans le raha hai alaav andhi masafaton ka
nigah manus ho rahi thi abhi paḌav ke manzaron se
main huun magar aaj us gali ke sabhi dariche khule hue hain
ki ab main azad ho chuka huun tamam a.ankhon ke da.eron se
qalam ke e.ajaz se kisi par unhen main kya iḳhtiyar dunga
vo jin ki tanzim ho saki thi na un ke apne payambaron se
jo ho sake to vajud hi ki khari adalat se faisla lo
fuzul hai jurm ke natije men dad-ḳhvahi sitamgaron se
Leave a Reply