Anjum Usman
har pal tira ḳhayal surud-e-ḳhayal hai
so chashm-e-tar bhi a.ina-e-aks-e-yar hai
us hila-ju ki yaad bhi ab raftani hui
ik hijr rah gaya hai so vo be-shumar hai
be-ḳhvab ratjage kabhi ashkon ke hain charagh
hai raftagan ka sog dil-e-be-qarar hai
tark-e-ta.alluqat ko go muddaten huiin
ab bhi dil-e-tabah magar sogvar hai
haft-asman bhi laakh tira parda-dar ho
har zarra ka.enat ka timsal-dar hai
mauj-e-tilism-e-shauq fareb-e-guman sahi
kya kijiye ki dil ko tira e’tibar hai
kab rakh saki asir-e-zaman-o-makan ki qaid
‘anjum’ nigar-e-zist to musht-e-ghubar hai
Leave a Reply