Meri Qismat Mein Wasl Us Ka Agar Ai Aasman Hota

mirī qismat meñ vasl us kā agar ai āsmāñ hotā

to tū bhī mehrbāñ hotā ḳhudā bhī mehrbāñ hotā

sitam ke ba.ad hotā hai karam bhī ye agar sach hai

mire dil par bhī aisā hī sitam ai jān-e-jāñ hotā

balā.eñ le ke dushman mar gayā merī balā samjhe

samajh meñ merī jab aatā tamāshā ye yahāñ hotā

zamīñ par sone vāloñ ko hiqārat se na Thukrātā

hamārī tarah gardish meñ jo tū ai āsmāñ hotā

chaman uudī ghaTā saaqī surāhī aur paimāna

ye sab sāmān hote shaiḳh kā phir imtihāñ hotā

sunā hai fasl-e-gul aa.ī huī phir gulshan-ārā.ī

chaman meñ kaash apnā bhī qafas ai bāġhbāñ hotā

vo merā ro ke kahnā un ke ‘shañkar’ hañs ke farmānā

are ulfat meñ koī bhī nahīñ hai shādmāñ hotā

Leave a Comment