Altaf Hussain Hali
ranj aur ranj bhi tanha.i ka
vaqt pahuncha miri rusva.i ka
umr shayad na kare aaj vafa
kaTna hai shab-e-tanha.i ka
tum ne kyuun vasl men pahlu badla
kis ko da.ava hai shakeba.i ka
ek din raah pe ja pahunche ham
shauq tha badiya-paima.i ka
us se nadan hi ban kar miliye
kuchh ijara nahin dana.i ka
saat pardon men nahin Thaharti aankh
hausla kya hai tamasha.i ka
darmiyan pa-e-nazar hai jab tak
ham ko da.ava nahin bina.i ka
kuchh to hai qadr tamasha.i ki
hai jo ye shauq ḳhud-ara.i ka
us ko chhoḌa to hai lekin ai dil
mujh ko Dar hai tiri ḳhud-ra.i ka
bazm-e-dushman men na ji se utra
puchhna kya tiri zeba.i ka
yahi anjam tha ai fasl-e-ḳhizan
gul o bulbul ki shanasa.i ka
madad ai jazba-e-taufiq ki yaan
ho chuka kaam tavana.i ka
mohtasib uzr bahut hain lekin
izn ham ko nahin goya.i ka
honge ‘hali’ se bahut avara
ghar abhi duur hai rusva.i ka
Leave a Reply