noon-meem-rashid

Hasan Kuza-Gar (2)

ai jahan-zad,

nashat us shab-e-be-rah-ravi ki

main kahan tak bhulun?

zor-e-mai tha ki mere haath ki larzish thi

ki us raat koi jaam gira tuut gaya

tujhe hairat na huii!

ki tire ghar ke darichon ke kai shishon par

us se pahle ki bhi durzen thiin bahut

tujhe hairat na huii!

ai jahan-zad,

main kuzon ki taraf apne tagharon ki taraf

ab jo baghdad se lauta huun

to main sochta huun

sochta huun tu mere samne aina rahi

sar-e-bazar dariche men sar-e-bistar-e-san.jab kabhi

tu mere samne aina rahi

jis men kuchh bhi nazar aaya na mujhe

apni hi surat ke siva

apni tanhai-e-jan-kah ki dahshat ke siva!

likh raha huun tujhe khat

aur vo aina mere haath men hai

is men kuchh bhi nazar aata nahin

ab ek hi surat ke siva!

likh raha huun tujhe khat

aur mujhe likhna bhi kahan aata hai?

lauh-e-aina pe ashkon ki phavvaron hi se

khat kyuun na likhun?

ai jahan-zad,

nashat us shab-e-be-rah-ravi ki

mujhe phir laegi?

vaqt kya chiiz hai tu janti hai?

vaqt ik aisa patinga hai

jo divaron pe ainon pe

paimanon pe shishon pe

mire jaam o subu mere tagharon pe

sada rengta hai

rengte vaqt ke manind kabhi

laut ke aaega hasan kuza-gar-e-sokhta-jan bhi shayad!

ab jo lauta huun jahan-zad

to main sochta huun!

shayad is jhonpade ki chhat pe ye makdi miri mahrumi ki

jise tanti chali jaati hai vo jaala to nahin huun main bhii?

ye siyah jhonpada men jis men pada sochta huun

mere aflas ke raunde hue ajdad ki

bas ek nishani hai yahi

un ke fan un ki maishat ki kahani hai yahi

main jo lauta huun to vo sokhta-bakht

aa ke mujhe dekhti hai

der tak dekhti rah jaati hai

mere is jhonpade men kuchh bhi nahin

khel ik saada mohabbat ka

shab o roz ke is badhte hue khokhle-pan men jo kabhi khelte hain

kabhi ro lete hain mil kar kabhi ga lete hain

aur mil kar kabhi hans lete hain

dil ke jiine ke bahane ke siva aur nahin

harf sarhad hain jahan-zad maani sarhad

ishq sarhad hai javani sarhad

dil ke jiine ke bahane ke siva aur nahin

dard-e-mahrumi ki

tanhai ki sarhad bhi kahin hai ki nahin?

mere is jhonpade men

kitni hi khushbuen hain

jo mere gird sada rengti hain

usi ik raat ki khushbu ki tarah rengti hain

dar o divar se lipti hui is gird ki khushbu bhi hai

mere aflas ki tanhai ki

yadon ki tamannaon ki khushbuen bhi

phir bhi is jhonpade men kuchh bhi nahin

ye mera jhonpada tarik hai ganda hai paraganda hai

haan kabhi duur darakhton se parindon ki sada aati hai

kabhi injiron ke zaitunon ke baghon ki mahak aati hai

to main ji uthta huun

to main kahta huun ke lo aaj naha kar nikla!

varna is ghar men koi sej nahin itr nahin hai

koi pankha bhi nahin,

tujhe jis ishq ki khu hai

mujhe us ishq ka yaara bhi nahin!

tu hansnegi ai jahan-zad ajab baat

ki jazbat ka hatim bhi main

aur ashiya ka parastar bhi main

aur sarvat jo nahin us ka talabgar bhi main!

tu jo hansti rahi us raat tazabzub pe mere

meri do-rangi pe phir se hans de!

ishq se kis ne magar paaya hai kuchh apne siva?

ai jahan-zab

hai har ishq saval aisa ke ashiq ke siva

us ka nahin koi javab

yahi kaafi hai ki batin ki sada guunj uthe!

ai jahan-zad

mere gosha-e-batin ki sada hi thi

mere fan ki thathurti hui sadiyon

ke kinare gunji

teri ankhon ke samundar ka kinara hi tha

sadiyon ka kinara nikla

ye samundar jo miri zaat ka aina hai

ye samundar jo mere kuzon ke bigde hue

bante hue simaon ka aina hai

ye samundar jo har ik fan ka

har ik fan ke parastar ka

aina hai

More Poems

Leave a Comment