vo qad-avar miri uncha.i se baḌh kar na hua
mere jhukne pe bhi vo mere barabar na hua
apni dastar ka sauda nahin hoga mujh se
vaqt ke qadmon pe ḳham mera kabhi sar na hua
apni ankhon se pila kar mujhe sairab karo
pyaas itni hai ki do ghunT samundar na hua
main to is bojh ko siine se alag kar dunga
dil ka kya kaam agar ye tira ḳhugar na hua
teri davat mire a.ine ko dhundla degi
jo jhuke shaah ke dar pe vo qalandar na hua
hai mire paas miri ḳhak-nashini ka javaz
main tire nain ke mansab pe muqarrar na hua
mere tevar hi ai ‘maqsud’ bachat hai meri
saḳht mushkil men bhi nilam ye zevar na hua
Leave a Reply