ḳhayal-e-tark-e-ulfat ham-nashino aa hi jaata hai
vafur-e-be-dili men aadmi ghabra hi jaata hai
tabahi ki ghaḌi shayad zamane par nahin aa.i
abhi apne kiye par aadmi sharma hi jaata hai
nigah-e-dost ke aage sipar laana hai la-hasil
ye tir-e-nim-kash qalb o jigar barma hi jaata hai
nazar aata nahin jis ko hujum-e-shauq men kuchh bhi
fareb-e-rahnuma aksar vo rah-rau kha hi jaata hai
nahin narmak-ḳhirami karvan ki be-sabab ‘kausar’
ḳhamoshi se jo uThta hai vo badal chha hi jaata hai
Leave a Reply