Qalam Mein Ashk Bhar Kar Likh Rahi Hun Dard Kaghaz Par

qalam men ashk bhar kar likh rahi huun dard kaghaz par

bikhere ja rahi huun hasraton ko sard kaghaz par

taḌap aurat ke dil ki sirf ik aurat samajhti hai

bas apni ḳhvahishon ko likh rahe hain mard kaghaz par

chalo maana ki kah lene se dukh halka hi hota hai

magar kuchh hi palon men itna saara dard kaghaz par

yunhi bas aaj main ne ik purani Diary kholi

jami thi kab se yadon ki purani gard kaghaz par

nisa.i karb likhne ka hunar ham ko hi aata hai

hukumat apni sabit kar rahe hain mard kaghaz par

tabhi ja kar ghazal ko ik na.e paikar men Dhala hai

lahu ki surḳh bunden jab giri hai zard kaghaz par

nami se gal bhi sakte hain sharar se jal bhi sakte hain

bharosa kar rahi hain kyon ‘siya’ be-dard kaghaz par