Faqat Shor-E-dil-E-Pur-Arzu Tha

Shad Azimabadi

faqat shor-e-dil-e-pur-arzu tha

na apne jism men ham the na tu tha

har ik ke paanv par jhukte kati umr

na samjhe ham ki kis qalib men tu tha

jahan pahunche usi ka nuur paaya

jidhar dekha vahi khurshid-ru tha

jagah daman men apne kyuun na dete

ki tifl-e-ashk apna hi lahu tha

kahun kya dil ki main nazuk-mizaji

khuda bakhshe nihayat tund-khu tha

main kaifiyyat kahun kya bazm-e-mai ki

ki miina haath men ankhon men tu tha

ghash aaya us ne tauli tegh jab jab

ajab halka hamara bhi lahu tha

bahut dhunda kahin paaya na ham ne

bata de ye ki kis goshe men tu tha

bacha qatil ka daman lillahil-hamd

bahut khaula hua apna lahu tha

udu the saqiya sab mai-kade men

yahi ik aas thi palle pe tu tha

libas-e-kuhna jab tha apna sad-chak

to phir bekar paivand o rafu tha

ghazab men aa ke tujh ko todta shaikh

natija bahas ka kya ai subu tha

tiri tasvir the ham bhi kisi vaqt

yahi naqsha hamara hu-ba-hu tha

nazar men hech tha kaunain saaqi

labalab jaam tha ham the subu tha

saza laghzish ki paate bazm men ham

khuda ko khair karna tha ki tu tha

ham apne hosh men baaqi the har tarah

magar jab tu hamare ru-ba-ru tha

tujhi se munh phula lete ajab kya

saba ghunchon ka bhi akhir numu tha

chale ham baagh se ai ‘shad’ kis vaqt

bahar aane ko thi gul ka numu tha