bahut se log mujh men mar chuke hain….
kisi ki maut ko vaaqe hue baara baras biite
kuchh aaise hain ki tiis ik saal hone aae hain ab jin ki rahlat ko
idhar kuchh sanehe taaza bhi hain hafton mahinon ke
kisi ki hadsati maut achanak be-zamiri ka natija thi
bahut se dab gae malbe men divar-e-ana ke aap hi apni
mare kuchh rabton ki khushk-sali men
kuchh aaise bhi ki jin ko zinda rakhna chaha main ne apni palkon par
magar khud ko jinhon ne meri nazron se gira kar khud-kushi kar li
bacha paaya na main kitnon ko saari koshishon par bhi
rahe bimar muddat tak mire batin ke bistar par
bil-akhir faut ho baithe
gharon men daftaron men mahfilon men raston par
kitne qabristan qaaem hain
main jin se roz hi ho kar guzarta huun
ziyarat chalte-phirte maqbaron ki roz karta huun
Leave a Reply