ahmad-adil

Ye Mai-Kashi Ka Sabaq Hai Nae Nisab Ke Sath

ye mai-kashi ka sabaq hai nae nisab ke saath

ki khun-e-dil hamen piina hai ab sharab ke saath

bas is yaqin pe hoti hain laghzishen aksar

ki rahmaton ka bhi daata hai tu azaab ke saath

ye qurbaton ka ishara hai ya judai ka

jo zard phuul mila hai tire javab ke saath

zara vo saath bhi chalte hain laut jaate hain

hijab tuut rahe hain magar hijab ke saath

kahin hai tangi subu ki kahin faravani

to phir giraft bhi maula usi hisab ke saath

agar raqib nahin hai to kaun hai vo shakhs

dikhai deta hai jo aj-kal janab ke saath

khayal-e-sud-o-ziyan aur husul-e-manzil-e-ishq

zaval-e-umr men jaise koi shabab ke saath

faqat yuun shor machane ka faeda kya hai

saza bhi dena zaruri hai ehtisab ke saath

hamare ho to zara khul ke e’timad karo

naya saval uthate ho kyuun javab ke saath

ye apne aap ko paana hai tujh ko khona kyuun

tamam umr kati hai is iztirab ke saath

ye sab ghurub ke asar hain ayaan ‘adil’

ki saae badhne lage Dhalte aftab ke saath

More Poems

Leave a Comment