dil-E-Mahjur Ko Taskin Ka Saman Na Mila

Akhtar Shirani

dil-e-mahjur ko taskin ka saman na mila

shahr-e-janan men hamen maskan-e-janan na mila

kucha-gardi men katin shauq ki kitni raten

phir bhi us sham-e-tamanna ka shabistan na mila

puchhte manzil-e-salma ki khabar ham jis se

vadi-e-najd men aisa koi insan na mila

yuun to har rahguzar par the sitare raqsan

jis ki hasrat thi magar vo mah-e-taban na mila

lala-o-gul the bahut aam chaman men lekin

dhundte the jise vo sarv-e-khiraman na mila

jis ke pardon se machalti ho vahi nikhat-e-shauq

be-khudi ki qasam aisa koi aivan na mila

bakht-e-be-dar kahan jalva-e-dil-dar kahan

khvab men bhi hamen vo ghuncha-e-khandan na mila

bekasi tishna-labi dard-e-halavat-talabi

chandni-rat men bhi chashma-e-haivan na mila

yuun to har dar pe hi kahte nazar aae daman

khinchte naaz se jis ko vahi daman na mila

kis ke dar par na kiye sajde nigahon ne magar

haae taqdir vo gharat-gar-e-iman na mila

kaun se baam ko rah rah ke na dekha lekin

nigah-e-shauq ko vo mah-e-khiraman na mila

dar-e-janan pe fida karte dil-o-jan ‘akhtar’

vaae bar-hal-e-dil-o-jan dar-e-janan na mila