Yahan Pe Jo Hai Wo Mazhab-Shikar Hai Han Hai

yahāñ pe jo hai vo maz.hab-shikār hai haañ hai

ḳhudā diloñ pe dimāġhoñ pe baar hai haañ hai

tamām muftī-o-vā.iz ḳhudā ko bechte haiñ

to kyā ḳhudā bhī koī kārobār hai haañ hai

har ek chiiz meñ tum aib dekhte ho nahīñ

tumhārā lahja shikāyat-guzār hai haañ hai

sabhī ko ḳhabt-e-ḳhud-ārā.ī-o-numā.ish hai

sabhī ke zehn pe aurat savār hai haañ hai

jo chand log mohazzab hue haiñ kahte haiñ

ki masḳharoñ meñ tumhārā shumār hai haañ hai

tum aaj bhī usī hasrat se mujh se miltī ho

to kyā abhī bhī mirā intizār hai haañ hai

Leave a Comment