Aziz Hamid Madni
atish-e-mina nazar aa.i harifana mujhe
ik taghayyur ki ḳhabar deta hai paimana mujhe
tishna-e-nazuk mizajan-e-kanisht-o-dair ka
barhaman kahne bhi de ek-adh afsana mujhe
kis qadar hairat-asar nikli hai marg-e-andalib
is sipas-e-jan se gul lagta hai begana mujhe
ik ḳhayal-e-zulf-e-janan ik hava-e-pech-pech
ik na ik zanjir-e-sar rakhti hai divana mujhe
bosa-e-janan men thi yuun to had-e-shukr-o-sipas
chahiye ik larzish-e-lab bhi raqibana mujhe
us ke paikar ki jhalak rahon pe thi nazdik o duur
kal ghurub-e-mahr tha ik a.ina-ḳhana mujhe
shahr jin ke naam se zinda tha vo sab uTh ga.e
ik ishare se talab karta hai virana mujhe
Leave a Reply