khinch laa.i thi mujhe ḳhushbu hi tere pairahan ki
par tiri ankhon men hai vahshat bhi ahu-e-ḳhutan ki
ishq ki atish kahan barud ke sho.ale hain raqsan
ab kahan vo zulf aur vo dastan dar-o-rasan ki
kya hue vo din ki jab aksar mayassar thi mujhe bhi
din ko zulmat zulf ki aur dhuup shab ko sim-tan ki
atish-e-furqat se main shab ko ujala mangta huun
ishq men hoti nahin hai had koi divane-pan ki
raushni jis ki miri ankhon ko ḳhira kar chuki hai
raakh kar ke chhoḌ degi ab hararat is badan ki
dekh ke raste ke manzar sab ke sab the gharq-e-hairat
yaad aise men bhala aati kise apne vatan ki
Leave a Reply