Ahmad Nadeem Qasmi
ab to shahron se khabar aati hai divanon ki
koi pahchan hi baaqi nahin viranon ki
apni poshak se hushyar ki khuddam-e-qadim
dhajjiyan mangte hain apne garebanon ki
sanaten phailti jaati hain magar is ke saath
sarhaden tutti jaati hain gulistanon ki
dil men vo zakhm khile hain ki chaman kya shai hai
ghar men barat si utri hui gul-danon ki
un ko kya fikr ki main paar laga ya duuba
bahs karte rahe sahil pe jo tufanon ki
teri rahmat to musallam hai magar ye to bata
kaun bijli ko khabar deta hai kashanon ki
maqbare bante hain zindon ke makanon se buland
kis qadar auj pe takrim hai insanon ki
ek ik yaad ke hathon pe charaghon bhare tasht
kaaba-e-dil ki faza hai ki sanam-khanon ki
Leave a Reply