Akhtar Shumar
tire baghair masafat ka gham kahan kam hai
magar ye dukh ki miri umr-e-ra.egan kam hai
miri nigah ki vus.at bhi is men shamil kar
miri zamin pe tera ye asman kam hai
tujhe ḳhabar bhi kahan hai mire iradon ki
tu meri sochti ankhon ka raz-dan kam hai
isi se ho ga.e manus ta.iran-e-chaman
vo jo ki baagh ka dushman hai baghban kam hai
agarche shahr men phaili kahaniyan hain bahut
koi bhi sunne-sunane ko dastan kam hai
nigah o dil pe khuli hain haqiqaten kaisi
ye dil udaas ziyada hai shadman kam hai
ab is se baḌh ke bhi koi hai pul-sirat abhi
main ji raha huun yahan jaise imtihan kam hai
Leave a Reply