Reza Reza Jaise Koi TuT Gaya Hai Mere Andar

reza reza jaise koī TuuT gayā hai mere andar

kaun hai ‘sayyad’ karb jo itne jhel rahā hai mere andar

ujḌī ujḌī ḳhvāb kī bastī sahrā sahrā āñkheñ merī

jaane ye tūfān kahāñ se aaj uThā hai mere andar

ḳhāmoshī se jhel rahī hai garmī sardī har mausam kī

majbūrī kī chādar oḌhe ek anā hai mere andar

aaj na jaane kyuuñ lagtā hai dil kā mausam nikhrā nikhrā

fasl-e-junūñ kā mehmāñ ban kar kaun rukā hai mere andar

zulf ke saa.e ḳhvāb kī manzil raas use kyā aa.egī ab

sahrā sahrā ḳhaak jo kab se chhān rahā hai mere andar

aaj bhī jaane kyuuñ lagtā hai itnā hī anjān sā kuchh vo

jis ne saare dukh-sukh bāñTe saath rahā hai mere andar

kab se khaḌā maiñ soch rahā huuñ īmāñ ke dorāhe par ye

ek to vo jo sab kā ḳhudā hai ek ḳhudā hai mere andar

Leave a Comment