paan kha kar surma ki tahrir phir khinchi to kya
jab mira khuun ho chuka shamshir phir khinchi to kya
ai muhavvis jab ki zar tere nasibon men nahin
tu ne mehnat bhi pai-e-iksir phir khinchi to kya
gar khinche siine se navak ruuh tu qalib se khinch
ai ajal jab khinch gaya vo tiir phir khinchi to kya
khinchta tha paanv mera pahle hi zanjir se
ai junun tu ne miri zanjir phir khinchi to kya
daar hi par us ne khincha jab sar-e-bazar-e-ishq
laash bhi meri pai-e-tashhir phir khinchi to kya
khinch ab naala koi aisa ki ho us ko asar
tu ne ai dil ah-e-pur-tasir phir khinchi to kya
chahiye us ka tasavvur hi se naqsha khinchna
dekh kar tasvir ko tasvir phir khinchi to kya
khinch le avval hi se dil ki inan-e-ikhtiyar
tu ne gar ai ashiq-e-dil-gir phir khinchi to kya
kya hua aage uthae gar ‘zafar’ ehsan-e-aql
aur agar ab minnat-e-tadbir phir khinchi to kya
Leave a Reply