Poet
raushan hazar chand hain shams-o-qamar se aap
gha.eb hain par nigah ki surat nazar se aap
ankhen bichhate phirte hain mushtaq raah men
kya janiye guzarte hain kis rahguzar se aap
ro.e koi gharib to hansna na chahiye
vaqif nahin kisi ke fughan-e-asar se aap
kanTe bhare hain ḳhat men jo chhute nahin ise
itna na haath khinchiye meri ḳhabar se aap
rahgir kyuun taḌapte hain tashvish thi mujhe
ab khul gaya ki jhankte hain chak-e-dar se aap
hammam ne to aur bhi chamka diya badan
goya naha ke nikle hain ab-e-guhar se aap
la.enge raah par ye ruḳh-o-zulf ek din
dekhenge shaam tak mira rasta sahar se aap
ankhon ki tarah rone lagen rauzan-e-makan
puchhen hamara haal jo divar-o-dar se aap
mirriḳh-pan mizaj men a.aza men nazuki
tegh-e-shua bandhiye apni kamar se aap
ai zahidan-e-ḳhushk ye ghairat ka hai maqam
agah aaj tak nahin ḳhaliq ke ghar se aap
zahir hai murgh-e-qibla-numa bhi gavah hai
ka.abe ki samt puchhte hain janvar se aap
kyunkar malak kahun ki malak ḳhadim aap ke
hain vo bashar ki malti hain ḳhairul-bashar se aap
jo baat aap ki hai mashiyyat ḳhuda ki hai
be-shubah muḳhtalat hain qaza-o-qadar se aap
phisla hai mere ansuon men paanv aap ka
bande ka sar utariye aaj apne sar se aap
ai ‘bahr’ rahm kha.ega vo rone par zarur
dho rakhiye apne munh ko zara chashm-e-tar se aap
Leave a Reply