Ek darkhwast

zindagi ke jitne darvaze hain mujh pe band hain

dekhna hadd-e-nazar se aage badh kar dekhna bhi jurm hai

sochna apne aqidon aur yaqinon se nikal kar sochna bhi jurm hai

asman-dar-asman asrar ki parten hata kar jhankna bhi jurm hai

kyuun bhi kahna jurm hai kaise bhi kahna jurm hai

saans lene ki to azadi mayassar hai magar

zinda rahne ke liye insan ko kuchh aur bhi darkar hai

aur is kuchh aur bhi ka tazkira bhi jurm hai

ai khudavandan-e-aivan-e-aqaed

ai hunar-mandan-e-ain-o-siyasat

zindagi ke naam par bas ik inayat chahiye

mujh ko in saare jaraem ki ijazat chahiye