Tanhaiyon Ke Ghar Mein Raha Hun Tamam Umr

tanhā.iyoñ ke ghar meñ rahā huuñ tamām umr

maiñ kis liye duniyā meñ jiyā huuñ tamām umr

tere baġhair aaj mujhe lag rahā hai yuuñ

ik ajnabī nagar meñ basā huuñ tamām umr

ā.īna dekhtā hai mujhe ā.īne ko maiñ

yuuñ aks aks TuuT gayā huuñ tamām umr

andar kī tīrgī mujhe kahtī hai baar baar

be-fā.eda jahāñ meñ jalā huuñ tamām umr

‘premī’ koī jo pūchhe merā haal to kahūñ

duniyā meñ ik tamāsha banā huuñ tamām umr

Leave a Comment