hina ye kahti hai lo be-zaban pa ke mujhe
jab aae aap gae choriyan laga ke mujhe
na dekhte the kabhi jo nazar utha ke mujhe
vo dekhte hain dam-e-hashr muskura ke mujhe
hina ye kahti hai un se suna suna ke mujhe
nahin shahidon men milna lahu laga ke mujhe
nigah se badh ke hain gustakh dast-e-shauq mire
na kosiyega zara haath utha utha ke mujhe
mira raqib mujhi sa rakha diya mujh ko
nikali chhed ki shakl aaina dikha ke mujhe
duhaiyan hain shab-e-vasl apni shokhi se
ki luute lete hain joban hasin pa ke mujhe
zara se dard ne dhaai hain afaten kya kya
patak diya hai zamin par utha utha ke mujhe
kaha jo un se charagh-e-lahad jalate jaao
hava se tez gae vo hava bata ke mujhe
kanar-e-ghair men raten tadap tadap ke katin
rahe na chain se vo qabr men sula ke mujhe
saba na daagh laga tu ye apne daman ko
kahegi sham-e-lahad kya mila bujha ke mujhe
main apne khuun ka beda uthaun khud kyunkar
vo paan dete hain shokhi se muskura ke mujhe
urus-e-gor ke pahlu men chain paunga
vahi sulaegi aghosh men daba ke mujhe
kaha tha kis ne ki lakhon ke dil karo pamal
jo kah rahe ho ki laale pade hina ke mujhe
nikal dunga shab-e-vasl bal nazakat ke
dara liya hai bahut tevriyan chadha ke mujhe
mana liya tire ruthe hue ko zalim ne
hansa diya tire navak ne gudguda ke mujhe
ye haath bandh ke kahta hai dil ke zakhm ka chor
huzur yaad hain sab hathkande hina ke mujhe
vo aa ke sharm se kahte hain meri turbat par
na dekhe sabza-e-khvabida sar utha ke mujhe
ye kya mazaq farishton ko aaj sujha hai
hujum-e-hashr men le aae hain bula ke mujhe
mite huon ke mitane ko ye bhi andhi hain
rahenge naqsh-e-qadam khaak men mila ke mujhe
kahunga hashr ke chhote se din men kya kya baat
bahut hi hausle hain arz-e-muddaa ke mujhe
qayamat aur qayamat men aai qahr hua
buton ne chhed diya samne khuda ke mujhe
ada-shanason ko marte bhi ban nahin padti
payam aate hain kab se miri qaza ke mujhe
satane vaalo qayamat bhi aai jaati hai
jafa ke lutf tumhin aenge vafa ke mujhe
tamam umr ke shikve mitae jaate hain
vo dekhte hain dam-e-naza muskura ke mujhe
kahan vo nuur ki surat vo nuur ki avaz
‘riyaz’ kaun sunae ghazal ye ga ke mujhe
Leave a Reply