Iqbal Sajid
ik rida-e-sabz ki ḳhvahish bahut mahngi paḌi
vaqt paḌne par hamen barish bahut mahngi paḌi
haath kya taape ki poron se dhuan uThne laga
sard rut men garmi-e-atish bahut mahngi paḌi
mom ki siḌhi pe chaḌh kar chhu rahe the aftab
phuul se chehron ko ye koshish bahut mahngi paḌi
ḳhar-e-qismat kya nikale haath zaḳhmi kar liye
naḳhun-e-tadbir ki kavish bahut mahngi paḌi
is amal ne to kahin ka bhi na rakkha dosto
ḳhud ko chahe jaane ki ḳhvahish bahut mahngi paḌi
zikr-e-qahat-e-rang se pahle hi taale paḌ ga.e
har lab-e-tasvir ko jumbish bahut mahngi paḌi
tund-ḳhu maujon ne ‘sajid’ chand sahil kha liye
bahr-e-shab men amn ki koshish bahut mahngi paḌi
Leave a Reply