Sufi
suni to us ne ghairon se hua go bad-guman ham se
bahar-surat rahi behtar hamari dastan ham se
zaban par aaegi kya paas namus-e-mohabbat se
nahin dohrai jaati dil men apni dastan ham se
chune the chaar tinke ek din sehn-e-gulistan men
raha ta-zindagi barham mizaj-e-baghban ham se
duhai hai gham-e-majburi-e-imkan duhai hai
ki phirti hain dam-e-rehlat hamari putliyan ham se
subuk-sar rah chuke hain ham bhi duniya men kabhi lekin
ye zikr us vaqt ka hai aap jab the sargiran ham se
qafas hi ho gaya tul-e-asiri se nasheman jab
na chhute ashiyan se ham na chhuta ashiyan ham se
zamana dusri karvat badalta bhi to kya hota
badal jaati na uftad-e-zamin-o-asman ham se
bahar aane se pahle ik pareshan khvab dekha tha
ki jaise fasl-e-gul men chhut raha hai ashiyan ham se
zamana saziyan qurban maaal andeshiyan sadqe
vo sunne aaj baithe hain hamari dastan ham se
madad ai lazzat-e-zauq-e-asiri ab ye hasrat hai
qafas vaale badal lete hamara ashiyan ham se
tasavvur men khincha naqsha hai un ke ru-e-rangin ka
ba-zahir parda-e-dil men hain ‘afqar’ vo nihan ham se
Leave a Reply