ahd-e-mayusi jahan tak sazgar aata gaya
apne-ape men dil-e-be-iḳhtiyar aata gaya
kuchh sukun kuchh zabt kuchh rang-e-qarar aata gaya
al-gharaz iḳhfa-e-raz-e-qurb-e-yar aata gaya
uḌte uḌte us ke aane ki ḳhabar milti rahi
baal khole muzhda-e-gesu-e-yar aata gaya
rafta rafta meri al-gharzi asar karti rahi
meri be-parva.iyon par us ko pyaar aata gaya
jasta jasta lahlahaya gulshan-e-zaḳhm-e-jigar
rafta rafta dasta-e-gul par nikhar aata gaya
niind ankhon men magar aati ga.i uḌti ga.i
dosh-e-nik.hat par payam-e-zulf-e-yar aata gaya
us ne jis had tak bhi ham se dastan-e-gham suni
ham ko is nisbat se fan-e-iḳhtisar aata gaya
ghaliban ye bhi hai meri kamyabi ka sabab
apni nakami pe ghussa baar baar aata gaya
un men shamil muskurate phuul bhi taare bhi hain
jin darichon se shu.ur-e-husn-e-yar aata gaya
aage aage ashiyane ḳhar-o-ḳhas chunte chale
pichhe pichhe taḳht-e-ta.us-e-bahar aata gaya
is qadar nazdik-tar aati rahi qadmon ki chaap
jis qadar ḳhadsha ḳhilaf-e-intizar aata gaya
us ke ruj.han-e-nazar men dilkashi paate hue
e’tibar-e-gardish-e-lail-o-nahar aata gaya
rang la.egi hamari tang-dasti ek din
misl-e-ghalib ‘shad’ gar sab kuchh udhar aata gaya
Leave a Reply