bad-e-sarsar bhi qurbat ki chalti rahe din nikalta rahe shaam Dhalti rahe
zulf hathon se tere sanvarti rahe din nikalta rahe shaam Dhalti rahe
teri chahat gulabon ki ḳhushbu bane mere divar-o-dar men kuchh aisi base
teri mahkar kamre se aati rahe din nikalta rahe shaam Dhalti rahe
tere ehsas ki tan pe chadar liye tere hamrah raqsan men aise rahun
pyaar ki mujh pe badli barasti rahe din nikalta rahe shaam Dhalti rahe
ruuh se ruuh ka rabt aisa bane jaise hathon men tere mira haath ho
phir mulaqat ḳhvabon men hoti rahe din nikalta rahe shaam Dhalti rahe
meri ghazlon men tera hi mazmun ho meri nazmon men to mujh se baten kare
yuun bayaz-e-tamanna bhi bharti rahe din nikalta rahe shaam Dhalti rahe
pyaar ke saat rangon ki qaus-e-quzah le ke aa.e ‘sabila’ vo milne kabhi
zindagi phir vahin ruk ke hansti rahe din nikalta rahe shaam Dhalti rahe
Leave a Reply