jaras-e-mai ne pukara hai uTho aur suno
shaiḳh aa.e hain su-e-mai-kada lo aur suno
kis tarah ujḌe sulagti hui yadon ke diye
hamdamo dil ke qarib aao ruko aur suno
zaḳhm-e-hasti hai koi zaḳhm-e-mohabbat to nahin
Tiis uTThe bhi to fariyad na ho aur suno
ḳhud hi har ghaav pe kahte ho zaban gang rahe
ḳhud hi phir pursish-e-ahval karo aur suno
dastan kahte hain jalte hue phulon ke charagh
abhi kuchh aur suno dida-varo aur suno
shahryaron ke hain har gaam pe charche ‘rahat’
ye vo basti hai ki bas kuchh na kaho aur suno
Leave a Reply