Naina Adil
us raste par do jismon ka ik saaya thaa!
aur do ruhon ka ik maslak!
guunj raha tha us raste par harf ka pahla sannata
dhadkan ki tasbih musalsal ism anokhe padhti thi
rusvai ki shokh havaen bebaki se raqsan thiin
us raste par gahre badal dhuup kiran se ladte the
khvab ke panchhi an-jani samton men udanen bharte the!
phulon ne khushbu ka mantar phunk diya tha sinon par!
us raste par tum the (shayad khud se na-vaqif)
us raste par main thii! aur main tum men shamil thi
zad-e-safar men ek thakan thii, ek dukhan aur ek yaqin!!
har qalb sarae hota hai aur ne hi guzargah har rasta
kuchh raston se laut bhi jaen, duur nahin ja sakte ham
kuchh manzar ban jaate hain nadida hissa ankhon ka
kuchh lamhon ki qaid hamesha dil ko katni padti hai
Leave a Reply