Azeem Kamil
ye sunte hi ḳhushi se ham bhi pichhe aa ga.e hain
vo saaf andaz men sab kuchh hamen farma ga.e hain
suhulat se kinara kar ke kar-e-ḳhair men bhi
sitam saare hamari zaat par vo Dha ga.e hain
ik aisa hadisa dar-pesh aaya tha yahan par
parinde hi nahin ashjar bhi ghabra ga.e hain
bhulane ka koi bhi rasta chhoḌa nahin hai
are pagal tire zehn-o-guman par chha ga.e hain
ḳhushi se toḌ ya mahfuz rakh marzi hai teri
khilaune hain tire hathon men jo ham aa ga.e hain
faqat da.ave nahin tu jaan bhi deta hai ham par
tire naḳhre hamen kuchh is sabab se bha ga.e hain
Leave a Reply